Путин не үшін оқшауланғанын түсіндірді

Ресей президенті Владимир Путин неге оқшаулау режимін сақтауға шешім қабылдағанын айтты.

Бұл туралы Orda.kz хабарлады.

РИА Новости мәліметіне сүйенсек, Душанбеде өтіп жатқан Ұжымдық қауіпсіздік туралы шарт ұйымы Ұжымдық қауіпсіздік кеңесінде Ресей басшысы видеобайланыс арқылы сөйледі.

– Өкінішке қарай, Душанбеге сапарымды соңғы сәтте тоқтатуға тура келді. Кешіріңіз, бірақ бұл өздеріңіз білетіндей, коронавирус жағдайларына байланысты. Бәрі жақын арада анықталды. Бұл бір емес, екі емес - бірнеше ондаған адам. Енді біз бірнеше күн бойы оқшаулану режимін сақтауымыз керек, - деді Владимир Путин.

Оның айтуынша, Ресей ұйым алдында тұрған негізгі міндеттерді алыстан болса да талқылауға мүдделі.

Еске салсақ, Ресей президенті Путин 15 қыркүйек оқшауланатынын айтып, Душанбедегі сапарына бармайтынын хабарлаған.

16-17 қыркүйекте Душанбеде ҰҚШҰ Ұжымдық қауіпсіздік кеңесінің сессиясы мен Шанхай ынтымақтастық ұйымына мүше мемлекеттер басшылары кеңесінің отырысы өтеді.