ПТР-анықтамасыз 211 қазақстандық шетелден ұшып келді

16 наурыз күні Қазақстан аумағына Германия, Мальдив, БАӘ, Мысыр, Түркия, Украина, Ресей, Грузия, Өзбекстан және Қырғызстаннан 27 халықаралық әуе рейсі ұшып келді, деп хабарлайды ORDA.kz.

Өткен тәулікте елімізге ұшып келген 3 640 жолаушының 3 429-ында коронавирусқа ПТР-тестілеудің теріс нәтижесі бар анықтама болған. Қалған 211-і анықтамасыз келді.

Атап айтқанда:

- Алматы әуежайына – 17 рейс, анықтамасыз - 171;

- Нұр-Сұлтан әуежайына – 5 рейс, анықтамасыз - 16;

- Шымкент қаласының әуежайына – 4 рейс, анықтамасыз - 24;

- Ақтау қаласының әуежайына – 1 рейс, барлық 147 жолаушы анықтамамен келген.

— Анықтамасы болмаған Қазақстан азаматтары келген жерлері бойынша COVID-19-ға ПТР-талдау әдісімен тестіленді және карантиндік стационарларда өз нәтижелерін күтуде, - деді комитеттен.

15 наурыз күні шетелден анықтамасыз келген 150 Қазақстандық азаматтардың барлығынан коронавирус анықталмады.