Психикалық мекемеде емдеудің орнына екі қабат қылғандар құрықталды

Шымкенттегі психикалық денсаулық орталығында зорлық-зомбылық жасады деген тағы бір оқиға анықталды. Тағы бір науқас мекеме қызметкерлері тарапынан жәбір көргенін айтты, деп хабарлайды Orda.kz.

Бұған дейін 17 жасар қыз өзінің қорлық көргенін айтқан болатын. Ол жүкті болып, денсаулығына байланысты түсік жасатуға мәжбүр болды.

Полиция екі оқиға бойынша да қылмыстық іс қозғалғанын айтты. Күдікті ретінде орталықтың екі қызметкері қамауға алынды.

«Қазіргі уақытта кешенді тергеу шаралары жүргізіліп,  екі күдікті соттың рұқсатымен қамауға алынды. Тергеу жалғасуда», делінген департамент түсіндірмесінде.

Еске сала кетейік, бұл жаға ұстатар жәйт қараша айында белгілі болды. Шизофрения диагнозы қойылған 17 жастағы науқастың анасы айтқандай, психиатриялық орталықта небары 2 ай жатқаннан кейін қызының күтпеген жерден жүкті болып қалғаны анықталған.

«Сол мекеменің қызметкерлері, яғни екі санитар қыздың дәрменсіз жағдайын пайдаланып келеке еткен. Арам ойларын санитарлар бақылау камерасы жоқ бөлмеде қыздың аяқ-қолын байлап, ұйықтататын иньекция салып іске асырған», – деген болатын 17 жасар қорлық көрген қыздың анасы.

Ал медициналық мекеме болған оқиғаларға қатысты түсінік беруден бас тартты.