Прокурор журналист «Амангелді Батырбековті өлтіруге тапсырыс берген» экс-шенеунікті 15 жылға соттауды сұрады

Түркістан облыстық қылмыстық істер жөніндегі мамандандырылған ауданаралық сотында прокурор республикалық «Сарыағаш-информ» газетінің бас редакторы Амангелді Батырбековті өлтіруге тапсырыс берді деп айып тағылған Сарыағаш аудандық адами әлеуетті дамыту бөлімінің (бұрынғы білім бөлімі – ред.) экс-басшысы Бауыржан Майриховты 15  жылға, оның сыбайластары Сабыржан Молдаходжаевты – 15 жылға, Әбдухамит Қуандықов пен Мейіржан Досболаевты – 19 жылға, Нұрғали Қыдырәлиевті — 18 жылға бас бостандығынан айыруды сұрады. Бүгін сот айыпталушыларға соңғы сөз берді.

4 қаңтарға қараған түні Түркістан облысы Сарыағаш қаласында Амангелді Батырбековтің үйінің маңында ұлы Дінмұхамедке белгісіз біреулер оқ атып, бой тасалаған. Кейіннен полиция бес адамның қамауға алынып, қылмыстық іс қозғалғанын хабарлаған.

Іс сотқа 13 шілде күні түскен. Айыпталушылар сотқа арнайы күзетпен жеткізілген.

Айыпталушылардың үшеуі Сарыағаш ауданы, екеуі Шымкент қаласының тұрғыны. Соңғы сөзде Майрихов пен Молдаходжаев тағылған айыпты мойындамайтынын, қалған үш айыпталушы мойындайтынын айтқан.

Айыптау актісіне қарағанда, Батырбеков Facebook парақшасында Сарыағаш аудандық білім бөлімі қызметкерлері мен басшылығының іс-әрекеттері жөнінде сыни мақалалар жазған. Осы материалдар негізінде білім бөлімінің басшысы Майрихов жұмыстан босатылған. Бұған кектенген ол Батырбековті қасақана өлтіруді ұйымдастырып, тапсырыс берген.

Айыпталушы Майрихов пен Молдаходжаев - Қылмыстық кодекстің «Адам өлтіру» бабымен, Қуандықов пен Досболов - «Адам өлтіру», «Қаруды заңсыз жасау» (288-бап), «Қазуды, оқ-дәрілерді, жарылғыш заттарды және жарылыс құрылғыларын заңсыз иемдену, беру, өткізу, сақтау, тасымалдау немесе алып жүру» бабы (287-бап), Қыдырәлиев «Адам өлтіру» және «Қаруды, оқ-дәрілерді, жарылғыш заттарды және жарылыс құрылғыларын заңсыз иемдену, беру, өткізу, сақтау, тасымалдау немесе алып жүру» бабымен айыпталған.

Сот үкім қай күні шығатыны белгісіз.