Прокуратура Оңтүстік Кореяның экс-президентін 10 жылға соттауды сұрады

Сеул орталық округтік сотында жұма күні өткен соңғы отырыста арнайы прокурор Чо Ын Сок бастаған айыптау тарабы Оңтүстік Кореяның бұрынғы президенті Юн Сок Ёлға қатысты жаза мерзімін жариялады, деп хабарлайды Orda.kz Yonhap агенттігіне сілтеме жасап.

Прокуратура экс-президентті сот төрелігін жүзеге асыруға кедергі келтіргені үшін 10 жылға бас бостандығынан айыруды сұрап отыр.

Тергеу мәліметтері бойынша Юн Сок Ёл қаңтар айында өзін ұстауға келген құзырлы органдардың әрекетіне тосқауыл қойып, заңды жұмыстарға кедергі келтірген. Сонымен қатар ол әскери жағдай енгізу жоспарын талқылау кезінде министрлер кабинетінің тоғыз мүшесін ресми отырысқа шақырмай, олардың заңды құқықтарын бұзды деп айыпталды.

Қорғаушы тарап бұл айып бойынша үкім шығаруды ақпан айына жоспарланған бүлік ұйымдастыру туралы негізгі сот процесі аяқталғанға дейін кейінге қалдыруды өтінді.

«Бұл айыптау бойынша шешім бүлік шығаруға қатысты негізгі процесс аяқталғаннан кейін ғана шығарылуы тиіс», деп мәлімдеді қорғаушы тарап.

Алайда судья бұл талапты орындаудан бас тартты. Қазіргі уақытта бұрынғы президентке қатысты барлығы төрт сот ісі жүргізіліп жатыр. Сот төрелігіне кедергі келтіру туралы іс бойынша үкім 16 қаңтарда шығады деп күтілуде. Бұл мерзім Юн Сок Ёлдың қамауда ұстау уақыты аяқталуына екі күн қалғанда орындалмақ.

Бұған дейін сот Юн Сок Ёлдың Солтүстік Кореяның әуе кеңістігіне арандату мақсатында дрондар жібергенін дәлелденді деп тапқан болатын. 2024 жылдың желтоқсанында енгізілген әскери жағдай ел ішінде жаппай наразылық тудырып, парламенттің бұл шешімнің күшін жоюына және кейіннен импичмент процедурасын бастауына себеп болды.

Егер барлық баптар бойынша кінәсі расталса, бұрынғы президент өмір бойына бас бостандығынан айырылуы мүмкін.