Прокуратура Мәсімовтің LRT-ке қатысы туралы түсініктеме берді

Нұр-Сұлтан қаласының прокуратурасы елорда әкімінің бұрынғы орынбасары Қанат Сұлтанбековтың ҚР ҰҚК бұрынғы басшысы Кәрім Мәсімовтің жанжал тудырған LRT ісін тергеуге кедергі келтіргені туралы ақпаратына түсініктеме берді.

BaigeNews.kz басылымының хабарлауынша, Сұлтанбеков қаңтар айында әлеуметтік желіде ҰҚК-нің бұрынғы басшысын жазықсыздарды заңсыз қудалады және жолдастарының қылмысын жасырды деп айыптаған.

«Енді сіз, Мәсімов, «Астана LRT» жобасының тергеуіне неге қатты араласып, өзіңізге берілген бар өкілеттікпен менің айғақтарыма жол бермей, жобаның ақшасын жымқырды деген айыптың барлығын маған жауып тастағаныңыз белгілі болды. Өйткені, 2015 жылы желтоқсанда осы жобаның несиелік құжаттарына қол қойған кезде Қытай даму банкінен несие алудың бастауында өзіңіз тұрдыңыз» деп жазды Сұлтанбеков.

Прокуратура Мәсімовтен Астана LRT ісі бойынша жауап алынды ма, жоқ па деген сауалға жауап берді.

«Сұлтанбековтың ҚР ҰҚК-нің бұрынғы басшысы К. Мәсімовке қатысты жария жазбасына орай, соңғысының іс бойынша айыпталушы болып табылмайтынын, сондықтан одан жауап алудың қажеті жоқ екенін хабарлаймыз» деп түсіндірді прокуратура.

Қанат Сұлтанбековтың өзі, прокуратураның мәліметінше, АҚШ-та, ал Astana LRT компаниясының бұрынғы басшысы Талғат Ардан Түркияда деген болжам бар.

«Осыған байланысты Арданды экстрадициялау материалдары Түркияға жіберілді, онда бұл елдің құзырлы органдары оны анықтау және ұстау жұмыстарын жүргізіп жатыр. Сұлтанбековке де экстрадициялау туралы сұрау салу жіберілді. Оны Қазақстанға беру мүмкіндігі бар. АҚШ-тың құзырлы органдары істі қарастыруда» деді Нұр-Сұлтан прокуратурасы.

Еске салсақ, Сұлтанбеков пен Арданға қатысты оларды күдікті деп тану туралы шешім қабылданған болатын.

8 қаңтарда ҚР ҰҚК бұрынғы төрағасы Кәрім Мәсімовтің мемлекетке опасыздық жасады деген күдікпен ұсталғаны белгілі болды. Билікті күштеп басып алуға бағытталған әрекет фактілері бойынша да тергеу басталды. Мәсімов әзірге тергеу изоляторындағы ұстау жағдайына шағымданған жоқ, деп хабарлады Қазақстандағы Адам құқықтары жөніндегі уәкіл Эльвира Әзімова.