Пробация қызметкерлеріне қатысты сотқа дейінгі тергеу басталды

Пробация қызметкерлеріне қатысты немқұрайлылық бойынша сотқа дейінгі тергеу басталды, деп хабарлады Бас прокуратура.

Бір күн бұрын Түркістан облысының Сарыағаш ауданында 13 шілдеде жоғалып кеткен бес жасар қыздың зорлықпен өлім белгілері бар денесі табылғаны белгілі болды. Сол күні полиция қызметкерлері қылмыс жасады деген күдікпен бұрын сотталған Г. атты аудан тұрғынын ұстап, уақытша ұстау изоляторына қамады. Кәмелетке толмаған баланы өлтіру бабы бойынша сотқа дейінгі тергеу амалдары басталды.

«Күдікті Г.-ның 2006 жылы кісі өлтіргені үшін 10 жылға бас бостандығынан айырылғаны анықталды. 2023 жылдың мамыр айында спирттік ішімдік ішіп отырып, жанжал барысында ауылдасын балтамен ұрғаны үшін сотталған. Сот Г.-ның жәбірленушімен татуласқанын және оның бұрынғы соттылығының жойылғанын ескере отырып, оған пробациялық бақылау орната отырып, үш жыл бас бостандығын шектеу тағайындалды» деп хабарлады Бас прокуратура.

Бас прокуратура бұл үкімге жазаны қатаңдату және бас бостандығынан айыру жазасын тағайындау туралы кассациялық наразылық келтірді.

Г.-ның пробациялық бақылауда бола тұра аса ауыр қылмыс жасағаны ескеріліп, пробация қызметкерлеріне қатысты  сотқа дейінгі тергеу басталды.

Қылмыстық істі тергеу барысы Бас прокурордың жеке бақылауына алынды.

Бұған дейін Түркістан облысында жоғалған бес жасар қызды өлтірді деген күдікті ұсталғаны хабарланған болатын.