Прилучный Шымкенттен не үшін көшіп кеткенін айтты

Ресейлік актёр Павел Прилучный Украинадағы жағдай туралы айтып, Қазақстандағы балалық шағының естеліктерімен бөлісті.

Бұл туралы Прилучный өзінің Instagram парақшасында жазды.

«Менің айналамдағы, достарым мен әріптестерімнің көпшілігінде ащы тәжірибе бар. Балалық шағыңда ештеңе түсінбейсің. Бірақ, қорқақтық бар. Себебі сен орыссың! Ата-анаң орыс және жақындағы көршілерің де орыс. Кейбірін бауыздап та үлгерген» деп жазды актер.

Оның айтуынша, «Қайта құру» кезінде олар Шымкенттен Новосибирск маңындағы Бердск қаласына қашуға мәжбүр болған.

«Осы күндері мен өзіме мына сұраққа жауап беруге тырыстым: неге біз, орыстар, қазақтар, украиндар, грузиндер, беларустар – аталары бірге соғысып қана қоймай, бірге жұмыс істеген, зауыттар салған. Көп жылдар бойы бірге болған достар бір-бірімізді жек көрумен уақытымыз өтеді? Бейбітшілік пен береке-бірлікте өмір сүруімізге не немесе кім кедергі?» деп сұрады Прилучный.

Еске салсақ, Ресей президенті Владимир Путин Донбас республикалары басшыларының үндеуіне жауап ретінде арнайы әскери операция жүргізу туралы шешім қабылдап, Украинаға қарсы соғыс жариялады. Алайда Ресей басшысы Мәскеудің жоспарында Украина аумақтарын басып алу жоқ екенін айтқан болатын.

2 наурыз күні таңертеңгі жағдай бойынша Ресей әскері 5840 адамынан айрылды. Сондай-ақ 60-тан астам ұшақ пен тікұшақ, 862 бронетранспортер, 85 артиллериялық жүйе және басқа да көптеген техника жойылды. 28 ақпандағы жағдай бойынша 352 бейбіт тұрғын, оның ішінде 16 бала қаза тауып, 2040 адам жарақат алды.

Украина президенті Владимир Зеленский Ресей әскерінің шабуылдың алғашқы сағаттарынан бастап азаматтық инфрақұрылымға соққы беріп жатқанын айтты. Президенттің айтуынша, Ресей басқыншы әскерлерінің Украинадағы әрекеттерінде геноцид белгілері бар.

27 ақпанда Украина «басқыншылықты ақтау үшін геноцид ұғымын бұрмалағаны үшін Ресейді жауапқа тартуды» талап етіп, Халықаралық сотқа Ресейге қарсы шағым түсірді. Ресейдің Украинаға басып кіруіне қатысты тергеуді Халықаралық қылмыстық соттың прокуроры Кәрім Ханның өзі бастады.