Президенттің немере інісін үйқамаққа жіберді

Қырғызстан президентінің немере інісі Ұлан Жапаров үйқамаққа жіберілді, деп хабарлайды Orda.kz «Kaktus Media» порталына сілтеме жасап.

Ұлан Жапаров алғаш рет 2023 жылдың маусым айында ұсталған болатын. Ішкі істер министрлігі оны кедендегі коррупциялық схемаларға қатысы бар деп күдіктенген. Төрт айдан соң, ол үйқамаққа жіберілді.

Алайда биылғы жылдың шілде айында Ұлан Жапаровты қайтадан Ұлттық қауіпсіздік комитеті ұстады. Бұл жолы оны ауыр қылмыс жасап, ірі көлемде материалдық зиян келтірді деп айыптап отыр.

«Kaktus Media» ақпарат көздерінің мәліметі бойынша, Ұлан Жапаров біреуге Қырғызстан президентінің облыстағы өкілі қызметін уәде етіп, 100 мың доллардан астам сыйақы алған, бірақ уәдесін орындамаған.

Ұлан Жапаров — Қырғызстан президенті Садыр Жапаровтың туған ағасы Рақымжан Жапаровтың ұлы.