Президенттің бұрынғы кеңесшісі Ержан Бабақұмаров 15 тәулікке қамалды

Алматы әкімінің бұрынғы орынбасары Ержан Бабақұмаров 15 тәулікке қамауға алынып, 7 жылға жүргізуші куәлігінен айырылды, деп хабарлайды Orda.kz.

Астана қаласының әкімшілік құқық бұзушылықтар жөніндегі мамандандырылған ауданаралық соты Ержан Бабақұмаровты Әкімшілік құқық бұзушылық кодексінің 608-бабының 1-бөлігі бойынша 15 тәулікке қамап, 7 жылға жүргізуші куәлігінен айырды.

Белгілі болғандай, 29 қаңтарда Астанада полициясы оның Toyota Land Cruiser Prado көлігін тоқтатып, Бабақұмаровтың жеңіл дәрежедегі мас күйде рөлде болғанын анықтады.

Айта кетейік, Ержан Бабақұмаров – "Орталық коммуникациялар қызметінің" бұрынғы директоры, экс-президент кеңесшісі және Алматы қаласы әкімінің бұрынғы орынбасары.