Президенттікке экс-үміткер «билікті төңкермек болды» деген айыппен абақтыға қамалды

Тәжікстан Демпартиясының бұрынғы басшысы және президенттікке кандидат болған Саидджафар Усмонзода «Тәжікстан билігін төңкермек болды» деген айыппен абақтыға қамалды. 

Бұл туралы «Азия-Плюс» радиосы хабарлады.

Бас прокурордың айтуынша, 2021 жылы қыркүйек айында Усмонзода «Паймони миллии Тәжікстан» атты террористік ұйымның басшысы Гадоевпен мемлекетті басып алу жайлы кеңескен. Сондай-ақ, Гадоев қаржылық көмек пен үш мыңнан астам содырларды шетелден Тәжікстанға әкелуге уәде берді. Усмонзода ел ішінен де, шетелден де жақтастарын тартып, оларға белгілі бір тапсырмалар беріп отырған. Осы қылмысқа, яғни ереуілге шыққандарға ақша төлеу үшін Усмонзода шет мемлекеттердің бірінің өкілінен 10 млн доллар сұрады. 

Естеріңізге сала кетейік, 11 мамырда партияның 18-ші кезектен тыс съезінде Саидджафар Усмонзода «көңіл толтырарлықтай қызмет атқара алмағанына» байланысты партия төрағасы қызметінен шеттетілді, ал оның орнына Шахбоз Аброр сайланды.