Президенттен соң – тексеру: Министрлік Алакөлдегі ахуалды бақылауға алды

Алакөлдегі жағдайға мемлекет басшысы Қасым-Жомарт Тоқаевтың сынынан кейін туризм және спорт министрлігі шұғыл әрекетке көшті. Министр Ербол Мырзабосынов Абай және Жетісу облыстарындағы көл жағалауын аралап шықты, деп хабарлайды Orda.kz.

Министрлік тексеріс барысында жергілікті әкімдік пен кәсіпкерлермен кездесті. Нәтижесінде инфрақұрылым бойынша бірнеше жүйелі мәселе анықталды. Жағажай аумағында санитарлық тораптар, душ кабиналары, киім ауыстыратын бөлмелер, қоқыс жәшіктері, құтқару мұнаралары мен шомылуға арналған қауіпсіздік шекараларының жетіспейтіні белгілі болды.

Су көліктерін бақылау да тиісті деңгейде емес. Қауіпсіздікке жауапты белгілердің аздығы — жағажайдағы демалушылар үшін нақты қауіп.

Министр Ербол Мырзабосыновтың айтуынша, туризм саласына қатысты заңнамаға өзгерістер енгізу көзделуде.

«Бұл өзгерістер қауіпсіздік, жайлылық және сервистің жоғары деңгейін қамтамасыз ететін жүйелі негіз қалыптастырады», — деді ол.

Министрлік мынадай тапсырмалар берді:

• жағажай инфрақұрылымын санитарлық жағынан жақсарту;
• қосымша қоқыс контейнерлерін орнату;
• шомылатын аймақтарды нақты белгілеп, қалқыма шекараларды кеңейту;
• душ, киім ауыстыратын орындар мен өзге де қажетті құрылғыларды орнату мүмкіндігін қарастыру;
• белсенді демалыс орындарын ұйымдастыру және көлеңкелік тенттер орнату;
• құтқару мұнаралары мен суға түсуге арналған баспалдақтарды көбейту;
• ақпараттық стендтер мен карта-схемаларды орналастыру.

Жергілікті атқарушы органдарға кемшіліктерді жою бойынша нақты мерзім белгіленді. Министрлік жақын күндері Алакөлге қайта тексеру жүргізетінін мәлімдеді.

Еске салсақ, 10 шілдеде президент Тоқаев Алакөлдегі жағдайға алаңдаушылық білдіріп, үкіметке еліміздегі барлық туристік аймақтарды тиісті деңгейге жеткізуді, ал олқылықтарға жол бергендерге шара қолдануды тапсырған еді.