Президенттен сөгіс естіген министр баспасөз мәслихатында жауап берді

Бүгін Баспасөз мәслихатында су министрі тасқынға байланысты жауап қатты, деп хабарлайды Orda.kz порталы.

Жиында Су және ирригация министрі Нұржан Нұржігітовке «Сізді Жамбыл облысы әкімі болғаннан бері жақсы білеміз. Ол жақта да өзіңіз іскер әкім ретінде көріне қойған жоқсыз. Су министрі ретінде лауазымды қызмет атқарып жатырсыз. Кеше президенттен сөгіс естідіңіз. Сіз өзіңізді Су министрі болуға лайықтымын деп есептейсіз бе?» деген сұрақ қойылды.

«Өзіңіз дұрыс айттыңыз. Бүгінгі күні Президент тарапынан тәртіптік жауапкершілікке тартылдық. Ары қарай осы жұмысқа лайықты немесе лайықты емес екенім туралы Президент шешім қабылдайды. Жұмысты қалай атқарып жатқанымызды Президент бағалайды.
Бүгінгі күні министрліктің жұмысы төтенше жағдайға байланысты, оның салдарын жоюға бағытталып отыр. Алты ай ішінде құқықтық базаны қалыптастырдық. Бүгінгі әр жергілікті атқарушы органмен қандай жұмыстарды атқаруымыз керек, қай көлемде екені жайлы жоспарларымыз бар. Алты айдың ішінде сол ауқымды жұмыстарды атқаруға ешқандай мүмкіндік болған жоқ. Қыркүйек айынан бастап осы бүгінгі күнге дейін мүмкіндік болмады.
Бүгінгі күні 20 су қоймасын салу жоспарланып отыр. Мен баяндамада айтып кеткендей, 9 су қоймасының жобалаушы жоспарлары дайындалып жатыр. Алтауы бірінші жарты жылдықта дайын болады. Одан бөлек 15 қорғаныста бар гидротехникалық құрылғылардың қайта жөндеу жұмыстарын қарастырып жатырмыз. Осы жұмыстардың арқасында 134 елді-мекеннің жалпы халықтың саны екі жүз мыңнан асатын су қоймасының қаупін төмендетуге мүмкіндік береді. Әрине, оған уақыт керек. Сол жұмыстарды жеделдетуге күш салып жатырмыз», – деді ол.

Айта кетейік, Нұржан Нұржігітов күні кеше прездиенттен сөгіс алған болатын.