Президентке «АрселорМиталл» -дың 2021 жылға арналған жоспары баяндалды

Кездесу аясында өндірістерді жаңғырту, экологиялық ахуалды жақсарту, өндірілетін өнім түрлерін кеңейту мәселелері талқыланды.

Бейнебайланыс форматында өткен кездесуге Премьер-Министрдің орынбасары Роман Скляр, Президент Әкімшілігі басшысының орынбасары Тимур Сүлейменов, Қарағанды облысының әкімі Жеңіс Қасымбек қатысты, деп хабарлайды Ақорданың баспасөз қызметі.

Мемлекет басшысы өндіріс қуатын жаңғыртуға және арттыруға тартылатын инвестициялар көлемін ұлғайту қажеттігін айтты. Кеме жасау, автокөлік өнеркәсібі және электротехникалық өндіріс салалары бойынша жаңа тауарлар шығару маңызды міндет болуы керек екендігіне де көңіл бөлінді.

Әңгімелесу барысында тараптар атмосфераға бөлінетін қалдықтарды азайту, оның ішінде, агроөнеркәсіпте, конверторларда, коксохимиялық өндіріс пен ЖЭО-2-де экологиялық жабдықтарды жаңғыртуға қатысты компанияның жоспарларына ерекше назар аударды. Қасым-Жомарт Тоқаев өндірістегі жарақат алу жағдайларын азайту, компанияның шетелдік және отандық жұмысшылары арасындағы еңбекақы көлемінің алшақтығына жол бермеу бойынша бірқатар тапсырмалар берді.