Президент сайлауына кандидаттарды ұсыну уақыты белгіленді

Қазақстанда президент сайлауына кандидаттарды ұсыну 23 қыркүйекте басталады. Бұл туралы Орталық сайлау комиссиясы 22 қыркүйек күнгі брифингте хабарлады.

– Президенттікке кандидаттарды қолдау үшін облыстар, республикалық маңызы бар қалалардың және Астананың кем дегенде 2/3 атынан теңдей өкілдік ететін, сайлаушылар санының кем дегенде 1 пайызының қолын жинау қажет. Қол қою парақтарын беру кандидаттың Конституция мен конституциялық заңның талаптарына сәйкестігін анықтағаннан кейін 5 күннің ішінде жүргізіледі, – деді ОСК төрағасының орынбасары Константин Петров.

ОСК 2022 жылдың 1 шілде күнгі жағдай бойынша, елде 11 827 277 адамның дауыс беруге құқығы бар екенін мәлімдеді.

Айта кетейік, әрбір кандидатта өзін қолдайтын кемінде 118,2 мың қол болуы тиіс. Сондай-ақ, кандидаттар 3 млн теңге көлемінде жарна төлейді.