Президент сайлауына 20,5 млрд жұмсалады

ОСК жұмсалатын қаржының неліктен екі еседен астам өскенін түсіндірді.

2022 жылы кезектен тыс президент сайлауын өткізуге бюджеттен 20,5 миллиард теңге бөлу жоспарлануда. 2019 жылы  бұл іске  9 млрд теңге кеткен болатын. Жұмсалатын қаржының артуы елдегі ең төменгі жалақы мөлшерімен байланысты.

Орталық сайлау комиссиясының мүшесі Сәбила Мұстафина барлық деңгейдегі сайлау комиссияларының 70 мың мүшесіне жалақы төленуі тиіс екенін айтты. Жалақы қоры ең төменгі жалақымен байланысты. Ол 2019 жылы 42 мың 500 теңге деңгейінде болса, биыл 60 мың теңгеге өскен.

— Осы сайлау науқанының бюджетіндегі үлкен секіріс кез келген науқанға арналған бюджеттің 80 пайызын құрайтын жалақы қорына байланысты. Бүгінге дейін біз Қаржы министрлігіне сайлау науқанын өткізуге шамамен шығындар сметасын бердік, қазір 20,5 млрд теңгені талқылау үстіндеміз. Біз сондай-ақ сайлау жәшіктерін сатып алу үшін, соның ішінде жаңа аймақтар мен жаңа сайлау учаскелерін құруға байланысты белгілі бір қаражат сұрадық, - деп түсіндірді Сәбила Мұстафина.

Бұған дейін Орталық сайлау комиссиясы төрағасының орынбасары Константин Петров Қазақстан президенттігіне кезектен тыс сайлауда кандидаттарды ұсыну 23 қыркүйекте басталып, 11 қазанда  18:00-де аяқталатынын мәлімдеген болатын.

2022 жылғы 21 қыркүйекте Мемлекет басшысы кезектен тыс Президент сайлауын 2022 жылғы 20 қарашаға белгілеу туралы Жарлыққа қол қойды.

— Жолдауымда мен жақын арада жүзеге асырылатын бірқатар ауқымды әлеуметтік-экономикалық шараларды жария еттім. Жақында жұртшылық назарына ұсынатын Сайлауалды тұғырнамада әлеуметтік-экономикалық прогреске қол жеткізуге бағытталған тың бастамалар айқындалады. Қазіргі мемлекет басшысы ретінде мен сайлау науқанының заңға сәйкес қатаң түрде өтуіне, оның әділ, ашық және отандық және халықаралық байқаушылардың кеңінен қатысуымен өтетініне кепілдік беремін, - деді Қасым-Жомарт Тоқаев Қазақстан халқына Жолдауында.