Президент олигархиялық жүйемен қоштасу керек екенін айтты

Президент Қасым-Жомарт Тоқаев Қазақстан олигополиямен, олигархиялық жүйемен толықтай қоштасуы керек екенін айтты.

Сондай-ақ, жаңа Қазақстан және екінші республика ұғымдары туралы сұраққа жауап берді.

– Қазақстан олигополиямен, олигархиялық жүйемен, мейлі ол экономикада немесе саясатта болсын, толықтай қоштасуға тиіс. Мұның бәрі болды, біз бұл туралы ашық айтамыз. Елде әлеуметтік әділеттілік болуға тиіс. Әрине, мен утопист немесе қияли емеспін, бұл бір күн, бір ай немесе бір жылда орындалатын жұмыс емес екенін түсінемін. Бірақ бұған ұмтылу керек, өйткені адамдар әділдікті қалайды, - деді Тоқаев «Россия 24» телеарнасына берген сұхбатында.

Президент елде әлеуметтік жеделсаты жұмыс істеуі керек екенін баса айтты.

– Барлығы тең болуы керек. Қалай болғанда да, әлеуметтік жеделсаты жұмыс істеуі керек. Біз мемлекеттік, ұлттық компаниялардағы белгілі бір лауазымдарға өте қабілетті, патриоттық рухы бар адамдарды таңдауымыз керек, бұл депутаттарды сайлауға да қатысты. Әрине, мемлекет басшысы ретінде мен Парламентке, сайлау нәтижесіне тікелей әсер ете алмаймын, - деді Тоқаев.