Президент Нұра ауданындағы №101 мектепке келді

Қазақстан Президенті Қасым-Жомарт Тоқаев Нұра ауданындағы №101 мектепке барып, екі ауысымда 4 мың оқушы оқитын білім ордасының жай-күйін біліп қайтты. 

Бұл туралы Ақорда хабарлады.

Сапар барысында Мемлекет басшысы оқу және шығармашылық сыныптарын, сондай-ақ спорт және акт залдарын аралады.

Президентке мектептің шығармашылық дағдыларды дамыту, цифрлық технологияларды оқыту, жасанды интеллектіні қолдану мүмкіндіктері, «Оқитын мектеп» жобасы және оқу бағдарламаларына робототехниканы енгізу жайында ақпарат айтылды.

Астана әкімі Жеңіс Қасымбек Президентке «Жайлы мектеп» ұлттық жобасы аясында салынатын 24 жаңа мектеп құрылысымен таныстырды. Білім және ғылым министрі Ғани Бейсембаев елімізде 302 мектептің құрылыс жұмысы жүргізіліп, 536 мың орынға арналған оқушылар орындарымен қамтылатынын мәлімдеді. 

Сонымен қатар, 280 білім ордасында 220 мың орынға арналған капиталды жөндеу жұмыстары жүргізіліп жатыр. Президенттің тапсырмасы бойынша 1,7 миллион бала тегін тамақпен қамтамасыз етіледі.