Президент әкімшілігінің жаңа басшысы туралы не белгілі

Президент Қасым-Жомарт Тоқаевтың жарлығымен Мұрат Нұртілеу оның әкімшілігінің басшысы болып тағайындалды. Президент әкімшілігінің жаңа басшысы туралы не белгілі болғанын Orda.kz тілшісі айтып береді.

45 жастағы Мұрат Нұртілеу тәжірибелі дипломат. Әл-Фараби атындағы Қазақ Ұлттық университетінің халықаралық қатынастар факультетін бітірген.

Тоқаев пен Нұртілеудің мансап жолы тоғысқан. Мысалы, 2019 жылдың 20 наурызында Тоқаев Қазақстанның жаңа президенті болған. Төрт күннен кейін ол Нұртілеуді Финляндия мен Эстониядағы елші қызметінен босатып, өзінің көмекшісі етіп тағайындаған.

2021 жылдың ақпанында Нұртілеу президент әкімшілігі басшысының орынбасары болды. Бұл қызметте ол 2022 жылдың 5 қаңтарына дейін жұмыс істеді. Қасіретті қаңтар оқиғасы кезінде Тоқаев оны Ұлттық қауіпсіздік комитеті төрағасының орынбасары етіп тағайындады. Енді міне, үш аптадан кейін Нұртілеу Ақордаға президент әкімшілігінің басшысы болып оралды.

Бұған дейін бұл қызметті Ерлан Қошанов атқарған. Ол Мәжіліс төрағасы Нұрлан Нығматулиннің орнына тағайындалды.

Нұртілеу бұған дейін Тоқаевтың тұсында жұмыс істеген. Мәселен, 2004-2007 жылдар аралығында ол алдымен ҚР Сыртқы істер министрінің кеңесшісі, кейін Сыртқы істер министрі хатшылығының меңгерушісі қызметін атқарған. Ол кезде Тоқаев Сыртқы істер министрі болатын.

2007-2011 жылдар аралығында Сенатта алдымен Аппарат басшысының орынбасары, кейін Аппарат басшысы қызметін атқарды. Содан кейін Тоқаев парламенттің жоғарғы палатасының спикері болды.

Сонымен бірге, Нұртілеу осы жылдар ішінде ҚР Сыртқы істер министрлігінің Ерекше тапсырмалар жөніндегі Елшісі, ҚР Сыртқы істер министрлігі Азия және Африка департаментінің директоры, министр- Женевадағы кеңесші, Президент Әкімшілігінің Сыртқы саясат орталығы меңгерушісінің орынбасары.

ҚР Президентінің Әкімшілігі немен айналысады?

Президент әкімшілігі түрлі тапсырмаларды орындайды. Мысалы, президентке келіп түскен жеке және заңды тұлғалардың өтініштерін қарайды; ҚР Қарулы Күштерінің, әскерлері мен әскери құралымдарының, құқық қорғау және өзге де мемлекеттік органдардың ұлттық қауіпсіздікті қамтамасыз ету жөніндегі қызметіне мониторингті, үйлестіруді және бақылауды жүзеге асырады.

Әкімшілік Президентке мынадай ұсыныстар жасайды:

• мемлекеттің әлеуметтік-экономикалық және өзге де ішкі саясатын, оның ішінде мемлекеттік жастар және ақпараттық саясатты, білім, ғылым, денсаулық сақтау, көші-қон, демография, мәдениет, тіл саясаты және спорт саласындағы саясатты қалыптастыру және жетілдіру туралы;
• елдегі ішкі саяси тұрақтылықты қамтамасыз ету, оның ішінде этносаралық және конфессияаралық қатынастар мәселелерінде;
• елдің әскери саясатының негізгі бағыттары, мемлекеттің қорғаныс қабілеті мен ұлттық қауіпсіздігін қамтамасыз ету саласындағы саясат, жұмылдыру және жұмылдыру дайындығы туралы.

Әкімшілік басшысы жоғары лауазымдарға тағайындалған кандидаттар бойынша президентке ұсыныстар жасай алады. Сондай-ақ, үкімет немесе өзге де мемлекеттік органдар жоғары лауазымдарға тағайындауға ұсынған кандидаттардың мемлекет басшысымен келісуін қамтамасыз ете алады.