Президент Қасым-Жомарт Тоқаев Алматылықтарды мерекемен құттықтады

Қасым-Жомарт Тоқаев  Наурыз мерекесі жаңару мен жаңғырудың символына айналғанын, биыл қоғамның дамуына ерекше айқын қадам басқанымыздың көрінісі екенін атап өтті, деп хабарлайды Orda.kz порталы.

«Еліміздің алдында биік мақсат тұр. Бұл – Әділетті Қазақстанды құру. Біз адал еңбек етіп, адал табысқа жете алатын әділ қоғам орнатуымыз керек. Мұндай қоғамды адал азаматтар қалыптастырады. Бір сөзбен айтсақ, әділдік пен адалдық – әрдайым қатар жүретін егіз ұғым. Сондықтан біз құрып жатқан қоғамда баршаға бірдей мүмкіндік беріледі. Әділетті мемлекет – бұл заң мен тәртіп үстемдігі. Озық мемлекет болу үшін бәріміз тек жарқын болашаққа сеніммен қарауымыз керек. Біздің үмітіміз – жастар. Қазақстанның келешегі сіздердің қолдарыңызда. Белсенді, санасы сергек, ойы ұшқыр, адал, көзі ашық жастарға біз әрдайым қолдау көрсетеміз», – деді Президент.

Президент құттықтау сөзінде Алматы қаласы еліміздің рухани, ғылыми және экономикалық орталығы екенін де тілге тиек етті.

«Алматы бүкіл Қазақстанның өркендеуіне зор ықпал етеді. Сондықтан мен Алматының дамуын, қала тұрғындарының тыныс-тіршілігін айрықша назарда ұстаймын. Әсем Алматымыз болашақта бұдан да көркейе беретініне сенемін», – деді Қасым-Жомарт Тоқаев.