Қазақстан президенті Қасым-Жомарт Тоқаев заңсыз шеруге қатысқан қазақстандықтарға ескерту жасады.

Бұл туралы Orda.kz хабарлады.

– Біз бейбіт жиналыстар туралы өте жақсы заң қабылдадық. Кім не десе де, бұл демократияны дамытудағы маңызды қадам. Ешкім бейбіт жиналыстарға, демонстрацияларға араласпайды. Бұл жерде бәрі жазылған, тіпті ресми рұқсат қажет емес, тек хабарландыру керек, – деді Тоқаев Қазақстан халқы Ассамблеясы кеңесінің кеңейтілген отырысында.

Президенттің айтуынша, бұл кішігірім талапты «кейбір азаматтарымыз белгісіз себептермен бұзуға болады деп ойлайды».  

– Мен мұндай әрекеттерге құқықтық баға берілетінін ескертемін. Бас прокуратураның міндеті – бұл заңды азаматтарымызға түсіндіруді жалғастыру. Ал барлық құқық қорғау органдарының міндеті – біздің заңнамамызға сәйкес қоғамдық тәртіпті сақтау, – деп қосты Тоқаев.

Мемлекет басшысы Қазақстандағы көпбалалы аналардың жиыны туралы да айтты.

– Кейбір көпбалалы аналар заңсыз әрекеттерге барады, жанжал шығарады, қоғамдық тәртіпті бұзады. Сіз тәуелділік мәселесі туралы өте дұрыс айттыңыз, бұл маңызды әлеуметтік мәселе деп ойлаймын, – деді Тоқаев кездесуге қатысушылардың біріне.

Бөлісіңіз: