Президент қазақстандықтарды Ораза айт мерекесімен құттықтады

Қазақстан Президенті Қасым-Жомарт Тоқаев пен Елбасы Нұрсұлтан Назарбаев еліміздің барлық мұсылмандарын Ораза айт мерекесімен құттықтады.

Бұл туралы Orda.kz хабарлады.

Қасым-Жомарт Тоқаев рухани тазару мен жаңаруды бейнелейтін бұл қасиетті мереке бүкіл ислам әлемі үшін ерекше маңызды деп мәлімдеді.

– Баршаңызды Ораза айт мерекесімен шын жүректен құттықтаймын!

Рухани тазару мен жаңаруға жол ашатын осы қасиетті мейрам күллі мұсылман қауымы үшін айрықша маңызды.

Рамазан айына жалғасқан бұл жарқын мереке қастерлі дініміздегі мейірім мен шапағат, жанашырлық пен қамқорлық сияқты асыл құндылықтарды дәріптейді.

Ораза айт әр адамның жүрегіне иман нұрын сеуіп, ізгілікке үндейді, жұртты жақсылыққа жетелеп, қоғамды игі істерге жұмылдырады. Сол арқылы халқымыздың береке-бірлігін нығайтып, ырыс-ынтымағын арттырады.

Баршамыз айттан айтқа аман-есен жете берейік!

Сіздерге зор денсаулық, бақ-береке тілеймін!

Әр шаңырақ шуаққа бөленіп, қуанышқа кенелсін!

Ораза айт құтты болсын! - делінген құттықтау сөзінде.

Сондай-ақ, Қазақстанның тұңғыш Президенті Нұрсұлтан Назарбаев та қазақстандықтарды Ораза айт мерекесімен құттықтады.

Елбасы мереке әр үйге жақсылық, өркендеу және қуаныш әкелсін деп тіледі.

– Құрметті отандастар!

Сіздерді Ораза айт мейрамымен шын жүректен құттықтаймын!

Ұлық мереке әрбір шаңыраққа шаттық, жақсылық пен молшылық әкелсін.

Ораза айт – бейбітшілік пен бірлікке үндейтін исламның сан ғасырлық қастерлі дәстүрлерінің символы.

Мейірімділік, рухани тазару, ізгі істер жасау – барлық ұлт пен дін өкілдеріне тән қасиет. Қазақстан халқын осы құндылықтар ұйыстырады, - деді Нұрсұлтан Назарбаев.

Ол өзара сыйластық пен келісім негізінде салынған осындай дәстүрді барынша жан-жақты нығайтуға шақырды.

– Ораза айт шын мәнісінде барша қазақстандықтарды біріктіретін мереке болып саналады.

Өзара сыйластық пен келісімге негізделген осы игі дәстүрлерді барынша нығайта беруге шақырамын.

Ораза Айт мейрамында баршаңызға зор денсаулық пен бақ-береке тілеймін!

Айт қабыл болсын! - делінген құттықтау сөзінде.