Президент қазақ пен өзбек олигархтарының айырмашылығын атады

Президенттің  айтуынша, бірі өз еліне шабуыл жасаса, екіншісі  керісінше, халқына көмектеседі.

Президент Қасым-Жомарт Тоқаев Еуропарламенттің Қазақстанға қатысты қабылдаған қарарын Қазақстан Республикасының азаматтары қаржыландыратын лоббистердің айтқаны деп санайды.

Бұл туралы ол «Хабар 24» телеарнасына берген сұхбатында айтты.

 — Бір кездері біздің елде қомақты қаржы тауып, Қазақстаннан кетіп қалған кейбіреулер  қазір белгілі бір шерулер ұйымдастыруға, халықты арандауға жұмсап, «неғұрлым жаман болса, соғұрлым жақсы» деген қағиданы ұстанады, - деді мемлекет басшысы.

Осы орайда ол біздің байларды өз елінен тысқары жерлерде мол табыс тауып, бүгінде елінің дамуына үлес қосуға тырысып жатқан Өзбекстан азаматтарымен салыстырды.

— Олар тарихи Отанына келіп, Өзбекстан президентінен «біз өзбек халқына не істей аламыз, қандай көмек көрсетеміз?» деп тапсырма беруін сұрайды. Өз қаражаттарына ауруханалар мен  инфрақұрылымдар салып жатыр. Олардың  шетелде отырып алып,  өз еліне шабуыл жасататын біздің олигархтардан  үлкен айырмашылығы бар, - деді президент.