Президент Қасым-Жомарт Тоқаев бірнеше заңға қол қойды

Президент Қасым-Жомарт Тоқаев бірнеше заңға қол қойып, аталған заңдар Ақорда сайтында жарияланды.

Атап айтқанда Мемлекет басшысы «Тәуелсіз Мемлекеттер Достастығына қатысушы мемлекеттер үкіметтері арасындағы 1992 жылғы 13 наурыздағы Салық саясатының келісілген қағидаттары туралы келісімнің қолданысын тоқтату туралы хаттаманы ратификациялау туралы» Заңға қол қойды.

 «Келісімге тәуелсіз посткеңестік мемлекеттердің қалыптасу кезеңінде салық салу принциптері мен ережелерін біріздендіруге негізделген келісілген салық саясатын жүргізу мақсатында қол қойылды. Содан кейін тараптар салық салуға ықпал ететін негізгі салықтардың бірыңғай тізімін қолдануға келісті. Мұнда ТМД-ға қатысушы барлық мемлекеттердің мүдделері болды. Сонымен қатар тараптар КСРО-ның шет мемлекеттермен табыс пен мүлікке қосарланған салық салуды болдырмау туралы бұрын жасаған келісімдерінің орындалуын қамтамасыз ету мәселесі бойынша уағдаласқан» делінген Сенаттың Қаржы және бюджет комитетінің қорытындысында.

Сонымен қатар Мемлекет басшысы «Қазақстан Республикасының Үкіметі мен Қытай Халық Республикасының Үкіметі арасындағы Ядролық материалдардың, радиоактивті материалдардың, радиоактивті қалдықтардың және радиациялық қауіпті заттардың заңсыз айналымына жол бермеу саласындағы ынтымақтастық туралы келісімді ратификациялау туралы» Заңға да қол қойды.

Сондай-ақ, Мемлекет басшысы «Қазақстан Республикасының Үкіметі мен Армения Республикасының Үкіметі арасындағы Армения Республикасына мұнай өнімдерін жеткізу саласындағы сауда-экономикалық ынтымақтастық туралы келісімді ратификациялау туралы» Заңға қол қойды.