Премьер-министрдің баспасөз қызметі Ақтөбеде журналистің ұсталуына қатысты пікір білдірді

Премьер-министрдің баспасөз қызметінің жетекшісі Қанат Құлшыманов Ақтөбеде журналист Ардақ Ерубаеваның ұсталуына қатысты пікір білдірді.

«Мен Ақтөбеде екі жыл тұрып, жұмыс істегенімді және Ардақпен кәсіби ғана емес, достық қарым-қатынаста болғанымды атап өткім келеді. Осы күндері біз онымен байланыста болдық. Әрине, мен барлық жағдайға таң қалдым.

Журналистердің кәсіби қызметіне мұндай шектеулер қоюға болмайды деп есептеймін. Ардақтың досы әрі әріптесі ретінде мен бұл жағдайдың тез әрі сәтті шешілуіне шын жүректен тілекшімін» деді Құлшыманов әлеуметтік желідегі парақшасында.

Құлшыманов 31 тамызда премьер-министрдің Ақтөбеге жұмыс сапарымен барып, депутаттар мен облыс әкімдерімен кездесу өткізгенін, премьер-министрдің қызметтік шағын автобусты пайдаланғанын айтты.

Баспасөз қызметінің басшысы ескі көліктерді фотоға немесе видеоға түсіруге ешкімге тыйым салынбағанын атап өтті.

Еске салсақ, «Азаттық» радиосы 5 қыркүйекте Ақтөбе қаласының соты 31 тамызда ұсталған журналист Ардақ Ерубаеваға полицияның бұйрығына бағынбады деп айыпталып, әкімшілік ескерту жасалғанын хабарлаған болатын.

Ерубаева мен оның адвокаты Сейсембай Ділманов сот шешімімен келіспейтіндерін айтып, апелляциялық шағым түсірмекші.