Премьер-министр Украинадағы жағдайға қатысты шұғыл жиын өткізді

Премьер-министр Олжас Бектенов Украина төңірегіндегі жағдайға байланысты президент берген тапсырмаларды орындау бойынша шұғыл жиын өткізді, деп хабарлайды Orda.kz. 

Олжас Бектенов қорғаныс, ішкі істер, төтенше жағдайлар, сыртқы істер, денсаулық сақтау, көлік, энергетика, өнеркәсіп және құрылыс, ұлттық экономика, қаржы министрліктері басшылығымен Мемлекет басшысының негізгі әскери және азаматтық нысандар қауіпсіздігін қамтамасыз ету жөнінде шұғыл шаралар қабылдау туралы тапсырмаларын орындау жөнінде жедел кеңес өткізді. 

Жиын барысында премьер-министр қорғаныс министрі Руслан Жақсылықовтың стратегиялық және инфрақұрылымдық нысандарды қорғауды қамтамасыз ету бойынша жүргізіліп жатқан жұмыстар туралы мәліметтерін тыңдады. Сонымен қатар мемлекеттік органдардың іс-қимылдарын күшейтуге бағытталған бірқатар міндеттер қойды. Тұрақтылық пен қоғамдық тәртіпті сақтау, көлік қатынасының қауіпсіздігі, денсаулық сақтау нысандарының қызметі және басқа да мәселелерге назар аударылды.

Еске салайық, бұған дейін президент Украинадағы жағдайға қатысты елдегі қауіпсіздікті қамтамасыз ету бойынша шаралар қабылдауды тапсырған еді.