Премьер-министр Смайылов Әзірбайжанға шақырту алды

ҚР премьер-министрі Әлихан Смайылов Әзірбайжан премьер-министрі Али Идаят оглы Асадовпен телефон арқылы сөйлесті.

Асадов Смайыловты премьер-министр қызметіне тағайындалуымен құттықтады.

Әзірбайжан премьер-министрі деструктивті күштердің агрессиясы салдарынан қаза тапқандардың отбасыларына қайғыра көңіл айтты. Сондай-ақ, ел үшін осындай қиын сәтте Қазақстан халқына қолдау білдірді.

«Әзірбайжан Қазақстанның сенімді стратегиялық серіктесі болып табылады. Екіжақты қарым-қатынастардың кең ауқымында елдеріміз арасында сындарлы саяси диалог пен жемісті өзара іс-қимыл жолға қойылды. Біз өзара тиімді сауда-экономикалық байланыстарды кеңейтуге және тереңдетуге бел байлаймыз» деді Смайылов.

Асадов Қазақстан премьер-министрін өзіне қолайлы уақытта Әзірбайжанға келуге шақырды.

Премьер-министрдің баспасөз қызметінің хабарлауынша, 2021 жылдың 10 айының қорытындысы бойынша өзара сауда көлемі 261 млн долларды құрады.

Биыл Қазақстан мен Әзірбайжан арасындағы дипломатиялық қарым-қатынастың орнағанына 30 жыл толады.