Премьер-министр Батыс өңірдегі гидроқұрылыстарды тексерді

Олжас Бектенов су тасқынының екінші толқынына байланысты батыс өңірлерге барып, гидро құрылыстың жай-күйін біліп қайтты, деп хабарлайды Orda.kz порталы.

Премьер-министр алдымен тікүшақпен Жайықтың жағдайын біліп қайтты. Премьер елді-мекендерге келетін тасқын судың алдын-алу үшін, су қоймаларына суды барынша жинау керек екенін айтты.

Жасалып жатқан жұмыстарды көргеннен кейін, Бектенов тұрғындардың өмірі мен денсаулығын, мүлкін барынша қорғау керек екенін, бұл жұмысты бәсеңдетпеу керек екенін тілге тиек етті.

«Қазіргі уақытта Ақтөбе, Қостанай, Құлсары қалаларындағы жағдай тұрақталып келеді. Петропавлда су тасқынының шарықтау шегі басталады, мұнда негізінен бау-бақша серіктестіктері су басу аймағында қалмақ. Жайық өзенінде күрделі жағдай сейілмеді. Ауқымды су көлемі Ресей аумағында айтарлықтай шығын келтіріп, Орал мен Атырауға қарай жылжып келеді. Бүгінде Жайық өзеніндегі су деңгейі 7,2 метр болып, күн сайын артып келеді. Қауіп белгісі - 8,5 метр. Судың қауіпті деңгейін ұстап тұруға мүмкіндік беретін қорғаныс бөгеттері салынды. Қазір басты міндет – Орал мен Атырауды тасқыннан сақтап қалу. Ол үшін әкімдіктердің, ТЖМ, Қорғаныс министрлігі мен Ұлттық ұланның, арнайы техникалық күштері жұмылдырылды. Еріктілер көп көмек көрсетуде.
Азаматтардың қауіпсіздігін қамтамасыз ету мақсатында Батыс Қазақстан және Атырау облыстарының әкімдеріне қажет болған жағдайда су басу аймағындағы үйлерін тастап шығудан бас тартқан тұрғындарды мәжбүрлі түрде эвакуациялау тапсырылды. Бұл ретте барлық бос үйлер полицияның тәулік бойы бақылауында болады», — деп атап өтті Олжас Бектенов. 

Сондай-ақ Үкімет басшысы тұрғындар сауалдары негізінде әкімдіктерге су тасқынынан келтірілген залалды өтеу алгоритмін түсіндіру жұмыстарын жүргізуді тапсырды.

«Су тасқынының басталу уақыты әр өңірде әртүрлі.  Кейбір тұрғындар өтініш беру мерзіміне қатысты алаңдап отыр. Уақыт шектеулеріне қарамастан тұрғындардың өтініштерін қабылдау қажет. Жоғарыда айтқанымдай, бюрократиялық әрекеттерге жол берілмеуге тиіс», — деп атап өтті Олжас Бектенов.