Полиция журналист Егеубаеваның көлігін өртегендерді іздестіріп жатыр

Полиция журналист Динара Егеубаеваның көлігін өртеп жіберу фактісі бойынша қылмыстық іс қозғады.

Алматы полиция департаменті бұл факті ҚР Қылмыстық кодексінің 202-бабы «Бөтеннің мүлкін қасақана жою немесе бүлдіру» бойынша сотқа дейінгі тергеп-тексерудің бірыңғай тізіліміне тіркелгенін хабарлады. Көлікті өртегендер әлі табылған жоқ. Тиісті сараптамалар тағайындалды.

Ведомствода қылмыстық істі қалалық полиция басқармасының тергеу бөлімі жүргізіп жатқанын түсіндірді. Тергеу барысы Қазақстан Республикасы Ішкі істер министрлігі мен Алматы қаласы Полиция департаментінің бақылауында.

Белгілі қазақстандық тележүргізуші әрі журналист Динара Егеубаеваның көлігі кеше түнде өртеніп кетті. Әйел бұл оқиғаны өзіне қарсы  әрекет деп бағалап, қаскөйлердің келесі қадамы бұдан да қатаң болуы мүмкін деп болжайды.

Көпқабатты үйдің жанында тұрған ақ түсті Kia Sou көлігі бір күн бұрын түн ортасы шамасында өртенген. Бұл туралы Егеубаева Instagram парақшасында хабарлады.