Полиция автобус дөңгелегінің  астында қалып қайтыс болған қыз туралы айтып берді

Алматы полициясы қыз баланың автобус доңғалақтарының астында қалып қаза тапқан қайғылы оқиғаның мән-жайын айтып берді.

Алматы полиция департаментінің баспасөз қызметі жол апатының 14 желтоқсан күні сағат 20.20-да Түрксіб ауданында болғанын хабарлады.

«Жүргізуші, 1972 жылы туған азамат У. «FOTON» маркалы автобуспен Құлжа күре жолымен оңтүстік бағытта келе жатып, оңға бұрылмақшы болғанда, жолдан өтіп бара жатқан жаяу жүргінші – 1998 жылы туған азаматша С.-ны қағып кеткен. Жаяу жүргінші арнайы белгіленген жерден өтпеген»  деп хабарлады полиция.

Сондай-ақ полицейлер жол-көлік оқиғасы салдарынан түрлі жарақаттармен ауруханаға жеткізілген жаяу жүргіншінің алған жарақаттарынан қайтыс болғанын айтты.

«Бұл дерек ҚР Қылмыстық кодексінің 345-бабының 3-бөлігі бойынша сотқа дейінгі тергеп-тексерудің бірыңғай тізіліміне тіркелді, тиісті сараптамалар тағайындалды.

Қылмыстық іс бойынша ҚР Қылмыстық-процестік кодексінің 201-бабының талаптарына сәйкес өзге де мәліметтер жария етуге жатпайды» делінген полиция хабарламасында.

Бұған дейін Алматыда жас қыздың автобус доңғалағының астында қалып қаза тапқаны хабарланған болатын. Қайғылы оқиға «Жетісу» базарының жанындағы соңғы аялдамада болған. Марқұм Лейла Саттарованың туыстары адам өліміне әкелген соқтығыстың куәгерлерін іздеп жатыр.