«Полицияның заңсыз әрекеті»: Нұрғанатты ауруханада бейнежазбаға жазып алған полицей жауап берді

Талдықорғанда 16 жасар Шерзат Полаттың өліміне қатысты іс бойынша сот отырысы әлі өтіп жатыр. Бүгін сотталушылардан жауап алу кезеңі басталуы керек, деп хабарлайды Orda.kz.

 Алғашқы болып сот отырысында куәгер полиция қызметкері Әділжан Медет  жауап берді.

«Хабарлама түскен соң, оқиға орнына бардым. Ғайыпбаев ауруханаға жарақатпен түскен соң, сол жерге бардық. Біз оған ұсталғандардың суретін көрсеттік. Ғайыпбаев Шерзатты Шынасыл Абзал, ал өзін пышақтаған Тоқтаубаев Нұрбол жаралағанын айтты. Ал мылтықты алып келген бауырым, яғни,  Шерзат деп айтты. Ол біз барғанда палатада жатты және «бізбен сөйлесе аласыз ба?» дегенде ол сөйлеуге мұршасы бар екенін айтты», — деді Медет Әділжанов.

Сол кезде сотталушы Тоқтаубаев Азамат осы куәгерге:

«Бізді «Арлан» ұстады ма, әлде полиция қызметкерлерді ұстады ма? Соны нақты айтсаңыз, өйткені бізді әлеуметтік желіде «Арлан» ұстады деген ақпарат жүр», — деп сұрады айыпталушы. 

Бұл сұраққа Медет Әділжанов күдіктілерді ұстаумен ол айналыспағанын және бұл сұраққа жауап бере алмайтынын айтты.

Прокурор:

«Ғайыпбаевпен сөйлесуге келгенде ол әңгімені бейнежазбаға жазуға қаулы шығарды ма?», — деп сұрады. 

Куәгер полицей бұл сұраққа «жоқ» деп жауап берді.

Ал куәгер полицей қаулы шықпаса да, бейнежазбаға түсіргенін және бұл осы қылмысты ашу мақсатында істеген әрекеті екенін айтып түсіндірді. Бірақ, заңның қай бабымен түсіргенін нақтылай алмады.