Полициядан көмек сұрағаны үшін соққының астында қалды

Адвокат Болат Бегімов фейсбукте Нұр-Сұлтан қаласы Алматы ауданының полиция бөлімі ғимаратында елорда тұрғынының соққыға жығылуы туралы айтты.

Бұл туралы Orda.kz хабарлады.

Оның айтуынша, оқиға 4 тамызға қараған түні болған. Елорда тұрғыны өзін қорқыту бойынша арыз жазуға полицияға келген. Алайда полиция қызметкері оны балағаттап, соққыға жыққан.

Бегімов Informburo.kz тілшісімен жәбірленушінің айғақтарымен бөліскен. Ер адам жұмыстан сағат 23:00 шамасында үйге қайтып келе жатқан. Аулада екі жігіт «оны өлтіреміз» деп қорқытқан. Ер адам полицияға хабарласып, барлығы Алматы ауданының полиция бөліміне жеткізілген. Ғимаратта жігіттердің бірі ер адамды қорлай бастаған, кейін ол полициядан көмек сұраған. Алайда құқық қорғаушылар әрекетсіздік танытқан.

Ер адам қайтадан 102 нөміріне қоңырау шалған, сол кезде полицей телефонды алған.

– Мен көшеге шығып, өтіп бара жатқандардан 102 нөміріне қоңырау шалуды сұрадым. Кейін кіре берістегі орындыққа барып отырдым. Күзетші полицей шығып, мені күшпен ішке кіргізбекші болды. Тіпті азаматтық киімде отырған адамға аяғымнан ұстауды сұрады. Ол бас тартты. Кейін басқа полицей келіп, мені шақыртты. Кірген бойда күзетші полицей маған тіл тигізді, мен ашуландым. Сосын мені жерге жықты. Мен дене жарақаттарын алдым. 103 нөмірі мен кезекші прокурорға хабарластым, - деді жәбірленуші.

Ол полиция қызметкеріне қарсы қызмет бабын асыра пайдалану туралы арыз жазды.

Кейінірек Нұр-Сұлтан полиция департаментінің жетекшісі Ержан Сәденов Ішкі қауіпсіздік департаменті бұл факті бойынша ресми тексеру жүргізетінін айтты. Тексеру нәтижесі бойынша шаралар қабылданады.