Полиция журналистер қызметін бөгеп, қоқан-лоқы көрсете ме?

Алтынтөбедегі наразылық кезінде полицияның журналистерге күш қолдануы бойынша қозғалған қылмыстық іс тоқтатылды.

Бұл туралы Orda.kz «Әділ сөз» баспасөзді қорғау ұйымына сілтеме жасап хабарлады.

Қордың айтуынша, полиция оқиға орнынан хабар таратқан журналистің жарақат алғанын анықтаған. Бірақ соның өзінде «қылмыстық құқықбұзушылық» фактілері табылмаған.

Еске салсақ, 4 сәуірде Шымкенттегі Алтынтөбе ауылының тұрғындары алтын бұйымдарын өндіретін жергілікті цех директорының ұсталуына наразылық білдірген.

Нәтижесінде полиция ондаған адамды ұстаған.

Сондай-ақ, полиция қызметкерлері оқиға орнынан хабар таратқан журналистерге қарсы күш көрсеткен:

• «31 арна» тілшісі Бахром Абдуллаевтың қолын жарақаттап, қолшатырын сындырған;
• «Астана» телеарнасының тілшісі Бахрамбек Талибжановқа қоқан-лоқы көрсеткен;
• «Азаттық» тілшісі Дилара Исаның телефонын тартып алуға тырысқан.

Оқиғадан кейін келесі күні Шымкент қалалық полиция департаментінің бастығы Ерғали Жармұхамбетов «барлық оқиға тексеріледі, қызметтік тексеріс басталды, қысым жасағандар жауапқа тартылады» деп журналистерден кешірім сұраған.

Наурыз айында журналистің кәсіби қызметіне кедергі келтірген шамамен сегіз оқиға тіркелген.

Айта кетсек, «Шекарасыз тілшілер» ұйымының сөз бостандығы бойынша рейтингте Қазақстан 180 елдің арасында 155-орында тұр. Яғни, елдегі жағдай қиын екенін осыдан байқауға болады.