Полиция қызметкерлері саунадағы демалысы үшін жұмыстарынан айрылды

ШҚО полиция департаментінің ішкі қауіпсіздік басқармасы саунадағы тәртіп сақшыларымен болған атышулы оқиғаға қатысты қызметтік тергеу жүргізді, деп хабарлады ORDA.

Еске салсақ, желіде тәртіп сақшылары саунада отырған фотосурет пайда болды. Суретте 18 адам бар.

Белгілі болғандай, 29 қаңтарда учаскелік полиция инспекторлары жергілікті полиция бөлімінің басшысымен бірге Семей қаласындағы монша кешенінде бос уақыттарын өткізген.

«Тексеру нәтижелері бойынша қызметтік тәртіп бұзғаны үшін орталық полиция бөлімінің жергілікті полиция қызметінің бастығы Р.С.Сұңғатов қызметінен босатылды. Учаскелік полиция инспекторлары қатаң тәртіптік жауапкершілікке тартылды», - деп хабарлады ШҚО ПД баспасөз қызметі.

Сонымен қатар, Семей унитарлық кәсіпорны мен қаланың орталық полиция бөлімінің бірқатар лауазымды тұлғалары өз міндеттерін адал атқармағаны және жеке құрамға бақылаудың жоқтығы үшін қызметінен босатылды.

Монша кешенінде болған полиция қызметкерлеріне қатысты санитарлық нормаларды сақтамағаны үшін әкімшілік жауапкершілікке тарту үшін тиісті материалдар ШҚО Санитарлық-эпидемиологиялық бақылау департаментіне жіберілді.

«Департамент басшылығы қазіргі уақытта басым бағыттардың бірі болып табылатын ШҚО ПД жеке құрамы арасында тәртіп пен заңдылықты сақтау үшін қажетті шараларды қабылдап жатыр. Қызметтік және әскери тәртіпті бұзудың бірде-біреуі қараусыз қалмайды», - деді департамент.