Полиция қызметкері 48 жастағы әйелді қағып өлтірді

Жамбыл облысындағы Шу қаласында аудандық полиция бөлімінің аға лейтенанты жаяу жүргіншіні қағып кеткен. Қатты соққыдан есін жия алмаған 48 жастағы әйел адам оқиға орнында көз жұмған. Бұл туралы КТК телеарнасы хабарлады.

Арнаның мәліметінше, куәгерлер полиция қызметкерінің мас болғанын және өзінің құқық қорғау органында істейтінін жасыру үшін бірден көлігінің мемлекеттік номерін шешіп, оқиға орнынан қашып кетпек болғанын айтқан.

Жамбыл облыстық полиция департаменті бұл ақпаратты жоққа шығарды. Олардың мәліметінше, жаяу жүргіншіні қағып кеткен 25 жастағы полиция қызметкеріне жасалған медициналық сараптама қорытындысына сай, оның спирттік ішімдік ішкені анықталмаған.

«Полиция қызметкері уақытша ұстау изоляторына қамауға алынды. Медициналық куәландыру қорытындысына сәйкес, 25 жастағы полицейдің ішімдік ішпегені және есірткі заттарын тұтынбағаны анықталды. Қазіргі уақытта жан-жақты тергеп-тексеру амалдары басталды» деді облыстық полиция департаментінің баспасөз қызметі.

Полиция департаментінің мәліметінше, жаяу жүргінші жолды рұқсат етілмеген жерден кесіп өтпек болған.