«Полиция, төбелес, жедел жәрдем»: Алматыдағы балалар үйінің тәрбиеленушілері Қонаевқа көшуге қарсы

Бүгін, 21 шілде күні Алматы облысындағы Бағанашыл ықшам ауданында орналасқан №1 балалар үйінің түлектері, демеушілері мен қазіргі тәрбиеленушілері мекеме қақпасының алдына жиналып, Қонаевқа көшу жайлы шешімге қарсылық танытты, деп хабарлайды Orda.kz. 

Бүгін таңертең балалар үйіне арнайы автобустар келіп, тәрбиеленушілерді алып кетуі керек еді. Бірақ балалар үйінің тәрбиеленушілері көлікке мінбей шу шығарды. Балалар арасында бір қыз есінен танып қалды, тағы бір бала қолын жарақаттап алды. Оқиға орнына полиция мен жедел жәрдем қызметкерлері келді. 

Қазір № 1 балалар үйінің директоры Роза Бекішева Алматы облысы әкімінің орынбасары және білім басқармасының өкілдерімен кеңесіп жатыр.

Балалардың Қонаевқа көшуіне қарсы тарап Қонаевтағы ғимарат кімнің балансында екенін білгісі келеді. Әрі олар Бағанашылдағы ғимараттың апатты екенін дәлелдейтін қорытынды құжатты және мердігер мен Алматы облысы әкімдігі арасындағы келісім құжаттарын көрсетуді талап етіп отыр. 

Айта кетейік, бұл балалар үйін көшіру туралы бастама биылғы наурызда көтерілген. Алайда қоғам белсенділері мен мекемеге қолдау көрсетіп жүрген демеушілердің қарсылығынан кейін жергілікті билік «көшірмейміз» деп уәде берген еді. Дегенмен уәде орындалмай, тәрбиеленушілер Қонаевқа көшетін болған. Балалар президент Қасым-Жомарт Тоқаев пен Алматы облысының әкіміне бейнеүндеу жолдап, сондай-ақ мәжіліс депутаты Бақытжан Базарбек пен Бала құқықтары жөніндегі уәкіл Динара Закиеваға жазбаша хат жазған.

Еске сала кетсек, Orda.kz тілшілері арнайы Қонаев қаласына барып, балалардың қандай жерде тұрып, немен айналысатындарын көріп қайтты.