Полиция такси жолаушысынан құны 30 млн теңге болатын "синтетика" тәркіледі

Шымкентте полиция такси жолаушысынан құны 30 млн теңге болатын "синтетика" тәркіледі.

 Қалааралық такси жолаушысы Алматыдан аса ірі көлемдегі синтетиканы алып бара жатқан. Жігіттің күдік тудырған әрекеттері туралы полицияға жүргізуші хабарлады.

Бұны сезіп қалған есірткі курьері жақын маңдағы бағдаршамда көліктен шығып, белгісіз бағытта бой тасалаған.

Оқиға орнына жеткен полицейлер ер адамның көліктің жүк салғышында қалған сөмкесінен скотчпен оралған үлкен орама ішінде ұнтақ салынған үш пакетті тапты. Сараптама тәркіленген заттың массасы 1,5 келіге жуық мефедрон психотроптық есірткі екенін растады.

Іздестіру іс-шараларының нәтижесінде полиция департаменті есірткі қылмысына қарсы іс-қимыл басқармасының жедел уәкілдері күдіктіні Алматы аумағында анықтап, ұстады. Ол Түркістан облысының 19 жастағы тұрғыны болып шықты.