Полиция «Оператор РОП» басқарушы директорының өлімін тергеп жатыр

«Оператор РОП» ЖШС-нің құқықтық мәселелер жөніндегі бұрынғы басқарушы директоры Руслан Шәмшиев қайтыс болды. Нұр-Сұлтан полициясы «Өзін-өзі өлтіруге итермелеу» бабы бойынша іс қозғады.

Елордалық полицияның мәліметінше, алдын ала болжам - суицид.

«Ер адамның мәйіті табылған соң, Есіл ауданының полиция бөлімі ҚР Қылмыстық кодексінің 105-бабы («Өзін-өзі өлтіруге итермелеу») бойынша қылмыстық іс қозғады» деп хабарлады Нұр-Сұлтан қаласы ПД баспасөз қызметі.

Қазір тергеудің толықтығы мен объективтілігін қамтамасыз ету мақсатында қажетті тергеу әрекеттері жүргізіліп жатыр.

Руслан Шәмшиев 2021 жылдан бері «Оператор РОП» ЖШС-нің құқықтық мәселелер жөніндегі басқарушы директоры болған.

Еске салсақ, бұған дейін Сыбайлас жемқорлыққа қарсы қызмет қызметкерлері бұрынғы экология вице-министрі Ахметжан Пірімқұлов пен «РОП Оператор» ЖШС басқарма төрағасы Медет Құмарғалиевті ұстағаны хабарланған болатын.