Полиция қызметкері ауыл тұрғынын өлтірді

Батыс Қазақстан облысында трактор мінген полиция қызметкері ауыл тұрғынын өлтірді, деп хабарлайды Orda.kz.

 «Мой город. Уральск» сайтының мәліметінше оқиға 11 қазан күні Сырым ауданы Бұлдырты ауылында болды.

Трактор қағып кеткен ер адам оқиға орнында қайтыс болды. Белгілі болғандай, МТЗ-80 тракторын аудандық ішкі істер бөлімінің қызметкері басқарған. Ол артқа қарай келе жатып 45 жастағы ер адамды басып өткен.

Облыстық полиция департаментінің баспасөз қызметі айыпталушының демалыста екенін хабарлады. Оқиғадан кейін бірден ішкі істер бөліміндегі жұмысынан босатылды.

Алғашында полиция қызметкері ұсталып, уақытша ұстау изоляторына қамалды, кейін сот оны үйқамаққа алу туралы шешім қабылдады.