Полиция капитаны 15 жылға бас бостандығынан айырылды

Қостанайда полиция капитаны азаматқа есірткі беріп, қастық жасағаны үшін 15 жылға бас бостандығынан айырылды.

Бұл туралы жоғарғы соттың баспасөз қызметі хабарлады.

«Сотталушының жеке басын, іс-әрекетінің сипаты мен қоғамдық қауіптілік дәрежесін, істің барлық мән-жайларын ескердік. Сондай-ақ Қылмыстық кодекстің 55-бабы 2-бөлігінің нормаларын қолдана отырып, сотталушыға үкім шығарылды. Өмір бойына мемлекеттік қызметте лауазымдарды атқару құқығынан айыру және 15 жылға бас бостандығынан айыру жазасы тағайындалды. Ол «полиция капитаны» деген атағынан айырылды»,  деп хабарлады Қостанай облысы ТЖД. 

Қостанай қаласы ІІД есірткі қылмысына қарсы күрес бөлімі бастығының орынбасары белгісіз полиция қызметкерлері тобымен бірлесе отырып, дене жарақатын келтіру және қорқыту арқылы бір азаматты екіншісіне аса ауыр қылмыс жасауға итермеледі. Оның мақсаты  -  кейіннен әшкерелеп, қылмыстық жауапкершілікке тарту болған.

«Аталған  шенеунік қызметтік көлікте отырып, қылмыстық әрекетті имитациялайтын адамға заңсыз, бірнеше рет психотроптық заттар мен олардың аналогтарын аса ірі көлемде сатқан», – деді сот. 

Көліктен аса ірі көлемде өткізу мақсатында заңсыз сақтаған және тасымалдаған гашиш пен меткатинон (психотроптық заттың аналогы) табылды.

Полиция қызметкері кінәсін мойындамады, оның әрекетінде қылмыс құрамының жоқтығына байланысты қорғаушылар ақтауды сұрады.

«Сотталушының кінәсі жәбірленушілердің, куәлардың айғақтарымен, тергеу әрекеттері хаттамалары мен бейнематериалдарымен, сот-медициналық сараптама қорытындысымен және басқа да іс материалдарымен толық дәлелденді» деп есептейді сот.