Полиция генерал-майоры Halyk Bank-тің топ-менеджері болды

Halyk Bank басқармасына Тимур Құлыбаев бақылайтын екі жаңа мүше қосылды. Олардың бірі – Қазақстандағы есірткі саудасына қарсы күрестің бұрынғы басшысы, полицияның генерал-майоры Тілеген Маткенов, деп хабарлайды Orda.kz.

KASE сайтында 13 наурызда жарияланған  құжатқа сәйкес, Halyk Bank басқармасының құрамы тоғыз адамға дейін кеңейтілді. Қауіпсіздік мәселелеріне жауапты Тілеген Маткеновтен бөлек банктың топ-менеджері болып IT бағыты мен инновацияларды қадағалайтын "Казтелепорт" АҚ директорлар кеңесінің мүшесі Андрей Заварзин тағайындалды.

Тілеген Маткенов ішкі істер министрлігінің еңбек сіңірген қызметкері, 2014 жылдан бері полиция генерал-майоры. Ақмола (2009–2012), Қостанай (2012–2016), Жамбыл (2016–2018) облыстарының ішкі істер департаменттерін басқарған. 2019–2022 жылдары ІІМ есірткі қылмысына қарсы іс-қимыл департаментінің бастығы болды.

Halyk Bank қауіпсіздік бағытын күшейту туралы шешімді Павлодардағы бөлімше қабырғасын жарып, тонау оқиғасынан кейін қабылдады. Қызығы, он жыл бұрын Қостанай облыстық полициясын басқарған кезде, жергілікті БАҚ Тілеген Маткеновтың өзі қарақшылықтың құрбаны болғанын хабарлаған. Журналистердің айтуынша, тоналған таунхаустағы брендті швейцариялық сағаттар мен зергерлік бұйымдар Маткеновке тиесілі болған. Полиция бұл нұсқаны жоққа шығарғанымен, ұрлық болған  мекенжайда Маткеновтың тұрғаны расталды. Ал департамент басшысы таунхаусқа досының оны айына 10 мың теңгеге уақытша кіргізгенін мәлімдеген.

Генерал-майордың есімі басқа жағдайда да аталды. 2022 жылы Қаржы мониторингі агенттігі заңсыз майнингке қарсы күрес туралы есебінде Қазақстанда «МВД департаментінің экс-басшысы Тілеген Маткеновпен байланысы бар компаниялар заңсыз майнингпен айналысқанын»  хабарлаған.

Павлодардағы Halyk Bank бөлімшесін тонау оқиғасынан кейін Ұлттық банк елдегі барлық банктік мекемелер үшін қауіпсіздік нормаларын күшейтті.