Полиция бастығы орынбасарының көлігіне оқ атқан адам ұсталды

Алматы облыстық полиция департаменті бастығының бірінші орынбасары Ержан Оразбеков отырған көлікке оқ атқан күдікті қамауға алынды.

Бұл туралы Orda.kz. хабарлады.

Полицейлер тек 6 күн өткеннен  кейін ғана 34 жастағы күдікті азаматты қолға түсірген.

— 2 шілде күні жедел-іздестіру жұмыстары барысында көлікке оқ атқан 34 жастағы Ж. есімді күдікті ұсталды. Қазір оның көлігі айып тұрағына қойылып, өзі уақытша ұстау абақтысына қамалды. Өзге ақпараттар  тергеу құпиялығына байланысты жарияланбайды , - делінген Алматы облыстық полиция департаментінің баспасөз қызметі таратқан хабарламада.

Естеріңізге салсақ, 26 маусым күні Алматы облыстық полиция департаменті бастығының бірінші орынбасары отырған көлікке белгісіз біреу оқ атты.

Оқиға Алматы-Талдықорған күре жолындағы Арқарлы асуының маңында болған.