Полицейлерді таяқпен ұрды: Алматыда екі шетелдік ұсталды

Бас прокуратура Алматыдағы тәртіпсіздіктерге белсенді қатысқан екі шетелдік азаматтың ұсталғанын хабарлады.

Ведомствоның мәліметінше, ұсталғандар 5 қаңтарға қараған түні қалалық әкімшілік ғимаратына шабуыл жасады деген күдікке ілінген.

«Бұл адамдар ғимаратты қорғаған мамандандырылған күзет қызметінің қарусыз қызметкерлеріне аяусыз күш көрсеткен» делінген ҚР Бас прокуратурасының хабарламасында.

Полиция қызметкерлерін таңдап алынған арнайы құралдар – қалқандар мен таяқшаларымен ұрып-соққан.

Қылмыскерлердің кім екені бейнежазба арқылы анықталды.

1 ақпанда сот санкциясымен олар қамауға алынды.

Ұсталғандарға қатысты Қылмыстық кодекстің 272-бабының 2-бөлігі (Жаппай тәртіпсіздікке қатысу), 380-бабының 3-бөлігінің 1, 4-тармақтары (Билік өкіліне күш қолдану) бойынша тергеу амалдары жүргізілуде. Олар 12 жылға дейін бас бостандығынан айрылуы мүмкін.