Полицейлер жаңғақ сатқан 75 жастағы әжейге дөрекілік танытқан

Желіде өз бетінше жаңғақ сатып отырған әжейді жауапқа тартқысы келген полицейлердің видеосы тарады.

Бұл туралы Orda.kz хабарлады.

Instagram парақшалардың бірінде 75 жастағы әжей орын алған жағдайдан кейін күйзеліске ұшырағанын жазды. Видеода бірнеше куәгерлер қарияны жақтап жатқанын көруге болады.

– Көмек сұрайын деп едім. Бүгін, 24 қазанда Қырғы базарда мынандай оқиға орын алды. Шетте 3-4 келі жаңғағын сатып отырған қарияға екі полицей дөрекілік танытты. Қара бетперде киген полицей әжеймен дөрекі сөйлесіп, телефонын тартып алды. Ол ұлына қоңырау шалып үлгермеді. Әжейдің жағдайы нашарлап кетті. Куәгерлер олардың арасына түсті. Полицейлер өзін таныстырмады да. Мен олардың артынан барып, екеуінің аты-жөні мен қызметін сұрайын деп едім, жауап бермеді, - деді жазба авторы.

Шымкент қалалық ІІБ оқиғаның Шымкент қаласының Әл-Фараби ауданында рейд кезінде орын алғанын айтты.

«Бұл бейнежазба бойынша қызметтік тергеу басталды. Тексеруден кейін полицейлерге қандай шара қолданылатыны белгілі болады» делінген Шымкент қалалық ПД хабарламасында.