Полицейлер заң бұзған Lexus көлігіне айыппұл салмағаны үшін жұмыстан қуылды

Қостанай облысында полицейлер Lexus көлігін тізгіндеген жүргізушіге айыппұл салмағаны үшін жұмыстан шығарылды, деп хабарлайды Orda.kz. 

Бұған дейін әлеуметтік желілерде патрульдік қызметкерлер жылдамдық асырғаны үшін Lexus жүргізушісін тоқтатқан бейнеролик пайда болды. Алайда көлік жүргізушісі полицейлердің өздеріне тап беріп, оның нөмірін «есте сақтап алу керегін» айтқан.  Әрі осы салада 11 жылдық тәжірибесі барын айтып, көлігіне мініп, кетіп қалған. 

Қостанай – Әулиекөл – Сұрған тас жолында Lexus автокөлігінің тоқтау фактісі бойынша қызметтік тексеру жүргізілді. Жүргізуші жылдамдық режимін асырған. Бірақ патрульдік полиция қызметкерлері оны жауапқа тартпаған. Тәртіптік комиссияның шешімімен екі инспектор да шара қолданбағаны үшін жұмыстан шығарылды. 

Құқық бұзушының жауапкершілігі туралы мәселе жеке тексеру қорытындылары бойынша қаралатын болады.