Полицейлер қазақстандықтар басқарған трансұлттық қылмыстық топты анықтады

Қазақстан Республикасы Ішкі істер министрлігі алғаш рет қазақстандық қылмыстық орта өкілдеріне қатысты трансұлттық қылмыстық желі құрды деген күдікпен сотқа дейінгі тергеп-тексеру жүргізуде, деп хабарлайды Orda.kz.

Polisia.kz мәліметінше, ҚР ІІМ алғаш рет халықаралық қылмыстық топтың қазақстандық жетекшілеріне қатысты сотқа дейінгі тергеп-тексеру жұмыстарын жүргізіп жатыр. Тергеп-тексерудің нысаны – үйлестіру орталығы елімізде орналасқан ірі трансұлттық ұйымдасқан қылмыстық топ.

Тергеушілер бірнеше қылмыстық істі қарастырып жатыр, олардың ішінде Қазақстан азаматтары қылмыстық қудалау нысанына айналды. Олар Қазақстанда және шет мемлекеттерде ауыр және аса ауыр қылмыс жасаған деп күдіктелуде. Тергеу нұсқасына сәйкес, олар бірнеше елді қамтитын қылмыстық желі құрған.

ҰҚК, Сыбайлас жемқорлыққа қарсы қызмет және Бас прокуратурамен бірлесіп, тергеу тобы дәлелдемелер базасын жинауда, оның ішінде мемлекетаралық деңгейде де жұмыстар жүргізілуде. Жалпы алғанда, 150-ден астам адам қылмыстық жауапкершілікке тартылуы мүмкін.

«Қазіргі уақытта трансұлттық сипаттағы белгілері бар ұйымдасқан қылмыстық топтарға қатысты жеті қылмыстық іс және қылмыстық қауымдастық құру фактісі бойынша бір іс тергелуде», – деп нақтылады ҚР ІІМ Ұйымдасқан қылмысқа қарсы күрес департаментінің өкілі Қуаныш Алпыс. 

Бұдан бөлек, Алматы қалалық Полиция департаменті қылмыстық топ мүшелерінің ұйымдасқан қылмыстық топ құру және оған қатысу фактілері бойынша қылмыстық істерді тергеуде. Олар күзет қызметін жамылып, негізінен бұзақылық, бопсалау және қару сақтау әрекеттерімен айналысқан. Олардың заңсыз әрекеттері биыл қаңтар айында Ұйымдасқан қылмысқа қарсы күрес басқармасы қызметкерлері арқылы тоқтатылды.

«Соңғы екі жыл ішінде ұйымдасқан қылмыстық топтарды құру, басқару және олардың құрамына қатысу фактілері бойынша қозғалған 90-нан астам қылмыстық іс аяқталып, сотқа жолданды. 13 ҰҚТ бойынша сот үкімдері шығарылды. 130-дан астам тұлға 20 жылға дейін бас бостандығынан айыру жазасына кесілді», – деп мәлімдеді Қуаныш Алпыс. 

Сондай-ақ, ол Qarmet АҚ нысандарынан ұрлық жасаумен айналысқан ұйымдасқан қылмыстық топқа қатысты көпэпизодты қылмыстық іс бойынша 24 адам түрлі мерзімге сотталғанын, оның ішінде топ басшысы 12 жылға бас бостандығынан айырылғанын хабарлады.

ІІМ мәліметінше, жыл басынан бері ұйымдасқан қылмыстық құрылымдардың жетекшілері мен қатысушыларына қатысты 51 қылмыстық іс қозғалды.

Алматыда адамдарды қорқытып, қару қолданып шабуыл жасаумен айналысқан ұйымдасқан қылмыстық топ 10 маусымда ҰҚК және ІІМ арнайы операциясы барысында залалсыздандырылды.