Полицейлер Алматы жүргізушілеріне маңызды ескерту жасады

Алматы қаласының полиция департаменті мегаполис жүргізушілеріне «Қауіпсіз жол» республикалық жедел алдын алу іс-шарасының басталғаны туралы ескертті, деп хабарлайды Orda.kz.

Акция аясында полиция қызметкерлері оңтүстік астананың көшелерінде, жолдарында және іргелес аумақтарында рейд өткізеді. Негізгі назар апат санының өсуіне тікелей әсер ететін ЖҚЕ өрескел бұзушылықтарды болдырмауға аударылады.

«Біз барлық жол қозғалысына қатысушыларды белгіленген ережелерді қатаң сақтауға шақырамыз. Оларды елемеу жолда жүргендердің өмірі мен денсаулығына қауіп төндіреді. Тек бірлескен күш-жігер арқылы ғана біз қаламыздағы қауіпсіздікті қамтамасыз ете аламыз», - деп атап өтті Алматы қалалық ІІД Жергілікті полиция қызметі басқармасының бастығы Серік Шумаев. 

Аталған шара 19 мамырға дейін жалғасады.

Бұған дейін алматылық полицейлер «Мерген» жедел алдын алу іс-шарасы аясында қалада азаматтық және қызметтік қару иелерін тексеру жүргізіліп жатқанын еске салған болатын.