Полицейлер Ақмола облысына ірі көлемде есірткі жеткізетін арнаны жапты

Есірткімен күресушілер Ақмола облысы аумағына аса ірі көлемде есірткі жеткізетін қылмыскерлердің әрекетін тоқтатты, деп хабарлайды Orda.kz ҚР ІІМ ТЖК баспасөз қызметіне сілтеме жасап.

Ақмолалық жедел уәкілдер Астанада жүргізген тұтқындау кезінде заңсыз айналымнан 34 келіге жуық марихуана тәркіленді,  бұл шамамен жеті мың дозаға тең, оның қара нарықтағы құны 34 миллион теңге болады.

Сонымен қатар, екі келіден астам гашиш табылды, бұл да 500-ден астам дозаға сәйкес келеді, құны бес миллион теңге.

54 жастағы ер адам есірткіні өз пәтерінде ғана емес, жалға алған жертөледе де сақтаған, полицейлер ол жерден де орауыш құралдарын тауып алған. Қазір сотқа дейінгі тергеу амалдары жүргізілуде. Күдікті қамауға алынды.