Полицейге шабуыл жасаған адам видеоға түсіп қалды

Солтүстік Қазақстан облысында діни араздық қоздырды деген күдікті азамат ұсталды.

Ішкі істер министрлігі оны ұстау кезінде полиция қызметкеріне шабуыл жасап, телефонын жоймақ болғанын хабарлады.

Полицейлер интернеттен араздық қоздыру белгілері бар басылымды тауып, тергеуді бастады. Басылымның авторы мән-жайды анықтау үшін бөлімге жеткізілді. Телефонын тексермек болған кезде ер адам оны сындырмақ болып, полицейлердің бірін қағып кетті.

«Күдікті қамауға алынды, араздық тудыру және билік өкіліне шабуыл жасау фактілері бойынша сотқа дейінгі тергеу амалдары жүргізілуде», – деді СҚО полиция департаменті басшысының орынбасары Асқар Мұхаметқалиев.

Полиция қызметкерінің денсаулығына келтірілген зиян дәрежесін сараптама анықтайтын болады.