Полицейге 1000 теңге ұсынған азамат жарты миллион айыппұл арқалады

Жезқазғанда мамандандырылған әкімшілік сот жол қозғалысы ережелерін бұзғаны үшін хаттама толтырудан қашпақ болған азаматтың ісін қарады. Ол жазадан құтылу үшін жол сақшысына 1000 теңге ұсынған, деп хабарлайды Orda.kz.

Оқиға 2024 жылғы 20 қазанда болған. Патрульдік полиция инспекторы азаматтың 1000 теңге көлемінде пара беру әрекетін дер кезінде тоқтатып, бұл туралы құзырлы органдарға хабарлаған.

Сот отырысында азамат С. өз кінәсін толық мойындап, жасаған ісіне өкінетінін айтты. Нәтижесінде оған Әкімшілік құқық бұзушылық туралы кодекстің 676-бабына сәйкес 516 880 теңге айыппұл салынды.

Соттың шешімі әлі заңды күшіне енген жоқ.